१६ भदौ, काठमाडौं । नेपालमा आएको विनाशकारी बाढीबाट प्रभावित परिवारलाई सहयोग गर्ने उद्देश्यले चर्चित भारतीय अभिनेता तथा समाजसेवी सोनु सूद आज काठमाडौं आइपुगेका छन्।
बाढी तथा डुबानबाट प्रभावित नेपाली परिवारप्रति ऐक्यबद्धता जनाउँदै सूद यसअघि नै सामाजिक सञ्जालमार्फत नेपालका बाढीपीडितलाई सहयोग गर्ने घोषणा गरेका थिए।
उनले राहत सामग्रीसहित नेपाल आउने तथा आवश्यक सहयोगमा सहभागी हुने प्रतिबद्धता जनाएका थिए।
नेपाल बसाइका क्रममा सूदले बाढीबाट प्रभावित परिवारसँग भेटघाट गर्ने कार्यक्रम रहेको बताइएको छ। साथै, राहत वितरण तथा प्रभावित नागरिकका लागि आवश्यक सहयोगमा समेत सहभागी हुने जनाइएको छ।
रसुवाको भोटेकोशीसहित विभिन्न क्षेत्रमा आएको भीषण बाढीले ठूलो जनधनको क्षति पुर्याएपछि प्रभावित नागरिकका लागि स्वदेश तथा विदेशबाट राहत र सहयोग जुट्ने क्रम जारी छ।
सूदले यसअघि नेपालका बाढीपीडितका लागि खाद्यान्न, आश्रय तथा पुनःनिर्माणमा सहयोग गर्ने बताएका थिए। विपद्का समयमा सामाजिक तथा मानवीय सेवामा सक्रिय रहँदै आएका सूदको नेपाल आगमनलाई बाढी प्रभावित नागरिकप्रति प्रत्यक्ष सद्भाव र सहयोगका रूपमा हेरिएको छ।
बाढीबाट प्रभावित परिवारलाई तत्काल राहत उपलब्ध गराउनुका साथै दीर्घकालीन रूपमा पुनःस्थापना तथा पुनःनिर्माणमा सहयोग आवश्यक भइरहेका बेला सूदको नेपाल भ्रमणले मानवीय सहयोग अभियानलाई थप बल पुग्ने अपेक्षा गरिएको छ।
नेपालमा विपद्को पीडाबीच विभिन्न व्यक्ति, संस्था तथा अन्तर्राष्ट्रिय समुदायबाट सहयोग प्राप्त भइरहेका बेला सोनु सूद आफैँ काठमाडौं आएर प्रभावित नागरिकलाई भेट्ने र राहत अभियानमा सहभागी हुने भएका हुन्।
