२० कार्तिक, काठमाडौँ । नेपाल प्रिमियर लिग (एनपीएल)मा कर्णाली याक्सलाई ३९ रनले पराजित गर्दै सुदूरपश्चिम रोयल्स अंकतालिकाको दोस्रो स्थानमा उक्लिएको छ।
शुक्रबार त्रिवि क्रिकेट मैदानमा भएको खेलमा १७७ रनको लक्ष्य पछ्याएको कर्णालीले २० ओभरमा ७ विकेट गुमाएर १३७ रन मात्रै बनाउन सक्यो।
कर्णालीका डेविड मिलरले ५४ बलमा ९३ रन बनाए पनि टोलीलाई जिताउन सकेनन्। सुदूरपश्चिमका स्कट कुग्लेजिनले २ विकेट लिए।
त्यसअघि पहिले ब्याटिङ गरेको सुदूरपश्चिमले ६ विकेटको क्षतिमा १७६ रन बनाएको थियो। सैफ जैबले ३५, विनोद भण्डारीले २७, ब्रान्डोन म्याकमुलेनले २४ तथा इशान पाण्डेले २३ रन जोडे।
यो जितसँगै पाँच खेलमा तीन जित निकालेको सुदूरपश्चिम ६ अंकसहित दोस्रो स्थानमा पुगेको छ। चार अंक रहेको कर्णाली पाँचौँ स्थानमा झरेको छ।
आजै हुने दोस्रो खेलमा चितवन राइनोज र पोखरा एभेन्जर्सबीच प्रतिस्पर्धा हुनेछ। खेल साँझ ५ बजे सुरु हुनेछ।
