काठमाडौं, पुस २७- नेपाल डोरीतान संघले दोस्रो राष्ट्रिय डोरी तान प्रतियोगिता गर्ने भएको छ । संघले आउदो माघ २६ र २७ गते कोशी प्रदेशको राजधानी विराटनगर सहिद रंगशालामा दोस्रो राष्ट्रिय डोरी तान प्रतियोगिता गर्न लागेको नेपाल डोरीतान संघका महासचिव बिमल पौडेलले हाम्रोसंचार डटकम जानकारी दिए ।
परापूर्वकालबाट खेल्दै आएको डोरी तान खेललाई पुनर्जीवित गर्ने उद्देश्यले प्रतियोगिता आयोजना गर्न लागिएको उनको भनाई छ । प्रतियोगिताबाट खेलप्रति लगाव भएका खेलाडीहरुलाई प्रतियोगितामा सहभागी गराई मनोबल बढाउने लक्ष्य राखिएको पौडेलले बताए ।
प्रतियोगिताअन्तर्गत माघ २६ गते टिमहरुको आगमन, तौल लिने र टिममिटिङ, २७ गते खेल सञ्चालन हुने महासचिव पौडेलले सुनाए। प्रतियोगिताका खेलहरु लिग कम नकआउटका आधारमा खेलाइनेछ । सहभागी टिमलाई दुई समूहमा विभाजन गरी लिग खेलाइने पौडेलले बताए । लिगका खेलपछी समूहको शीर्ष स्थानमा रहने २–२ टोली सेमिफाइनलमा प्रवेश गर्नेछन् । त्यसपछि बेष्ट अफ थ्रिमा नकआउट खेलाइने छ ।
प्रतियोगिताको विजेतालाई १ लाख र उपविजेतालाई ५० सहित ट्रफी मेडल र प्रमाणपत्र प्राप्त गर्नेछन् ।
प्रतियोगितामा ७ प्रदेशसहित ३ विभागीयले सहभागिता जनाउने आयोजकले जनाएको छ । एक टिममा ८ जना खेलाडी र बैकल्पिक खेलाडी, कोच र मेनेजर १–१ जना हुनुपर्नेछ । खेल्ने ८ खेलाडीको सामूहिक तौल ६ सय भन्दा धेरै हुन पाइने छैन ।
प्रतियोगिता गर्न संघले राष्ट्रिय खेलकुद परिषद् (राखेप) बाट मान्यता पाइसकेको छ ।
