काठमाडौं, मंसिर २- चार्टर उडान अनुमति नलिई कम्तिमा ६ सय यात्रुलाई टिकट बिक्री गरेर अलपत्र पारेको भन्दै नागरिक उड्डयन प्राधिकरणले कुवेतको सरकारी ध्वजाबहाक वायुसेवालाई कारबाही गर्न त्यहाको डाइरेक्टोरेट जेनरल अफ सिभिल एभिएसन, कुवेत(डीजीसीए) लाई पत्राचार गरेको छ ।
प्राधिकरणका सहायक प्रवक्ता ज्ञानेन्द्र भुलका अनुसार, केही दिनअघि कुवेत एयरवेजको नेपाली जीएसए (सेल्स एजेन्ट) कम्पनीले त्यहाको श्रम बजारमा जाने नेपालीहरुलाई चार्टर उडानबाट टिकट बिक्री गर्दै त्रिभुवन अन्तर्राष्ट्रिय विमानस्थलमा पठाएको जानकारी पाएपछि कारबाही गर्न कुवेतको डीजीसीएलाई पत्र पठाइएको बताए ।
प्राधिकरणका अनुसार, यस एयरलायन्सको नेपाली जीएसए कम्पनी ट्रान्सपोर्ट सोलुसनले प्राधिकरणबाट अनुमति नलिई टिकट बिक्री गर्ने र यात्रु अलपत्र पार्ने गरेको थियो ।
त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरका अनुसार, बिहीबारअघिसम्म उडान नै नभएको कुवेत एयरवेजको टिकट लिएका यात्रुहरु विमानस्थलमा आउने तर त्यहाँ उडान अनुमति नै नभएको देखिएपछि कुवेत एयरलायन्ससँग सम्बन्धित एजेन्ट कम्पनी र अन्य कर्मचारीलाई सचेत गराइएको थियो ।
यसअघि प्राधिकरणले अनुमति नै नलिई यात्रुलाई बोर्डिङपास दिने नेपाल वायुसेवा निगमका कात्तिक १३ र १४ गतेका दुइटा दिल्ली उडान रद्द गरेको थियो ।
यसैबीच प्राधिकरणले बिहीबार साँझ एक विज्ञप्ति जारी गर्दै वायुसेवा र तीनका एजेन्ट कम्पनीलाई उडान अनुमति नलिई टिकट बिक्री गर्न चेतावनी दिएको छ । प्रवक्ता जगन्नाथ निरौलाद्वारा जारी विज्ञप्तिमा ‘अनुमति नलिई यात्रुलाई अलपत्र पार्ने विमानस्थलमा अनावश्यक भीडभाड गराई त्यहाँको सुरक्षा व्यवस्थामा खलल पार्ने कार्य नगर्न’ चेतावनी दिइएको छ ।
कुवेत एयरवेजको नेपाली एजेन्ट कम्पनी ट्रान्सपोर्ट सोलुसनका इन्चार्ज रुपेश झाले अनुमती नलिई टिकट बिक्री गरिएकोमा गल्ती भएको स्विकारे । ‘पर्मिसन नलिई ६ सयजति टिकट बिक्री गरेका थियौं । यसमा गल्ती भयो । कति यात्रुको डेट चेन्ज गरिदियौं । कतिलाई टिकट रिफन्ड गर्यौं,’ उनले भने, ‘केही यात्रुलाई शुक्रबार बिहानदेखि सुरु भएको नियमित उडानमा पठायौं ।’
उनका अनुसार, जीएसए कम्पनी ट्रान्सपोर्ट सोलुसन दिपक मलोत्रा र सुशिल थापाको कम्पनी हो । कान्तिपुरबाट ।
