काठमाडौं, साउन ११- ललितपुरको एकान्तकुनामा मंगलबार राति रोकी राखेको मिनि ट्रिपरमा मोटरसाइकल ठोक्किँदा एक जनाको मृत्यु भएको छ भने अर्का एक जना घाइते भएका छन् ।
एकान्तकुनास्थित सुजुकी ट्रायल सेन्टर अगाडी सडकको छेउमा रोकी राखेको बा ३ ख ५७७ नम्बरको मिनि ट्रिपरमा बागमती प्रदेश ०२–०२७ प ६३३८ नम्बरको मोटरसाइकल ठोक्किँदा मोटरसाइकल चालक खोटाङ घर भई हाल ललितपुरको गोदावरी नगरपालिका–१२ ठेचो बस्ने अन्दाजी २३ वर्षीय ठगिन्द्र राईको मृत्यु भएको प्रहरीले जनाएको छ ।
दुर्घटनामा घाइते भएका राईको जावलाखेल स्थित अल्का अस्पतालमा उपचारकै क्रममा मृत्यु भएको हो ।
यस्तै, पछाडी सवार ललितपुरकै महालक्ष्मी नगरपालिका–१४ रानीबु बस्ने अन्दाजी ३५ वर्षीय सुरज अधिकारी घाइते भएका थिए । उनको सोही अस्पतालमा उपचार भइरहेको छ ।
दुवै सवारी साधन र ट्रिपर चालकलाई प्रहरी वृत सातदोबाटोले नियन्त्रणमा लिएको छ ।
