१३ असाेज, काठमाडौं । जापानमा जारी २०औँ एसियाली खेलकुदअन्तर्गत श्रीलंकासँगको क्वार्टरफाइनल खेल वर्षाका कारण रद्द भएपछि नेपाली क्रिकेट टोली प्रतियोगिताबाट बाहिरिएको छ।
नागोयास्थित कोरोगी स्पोर्ट्स पार्कमा मंगलबार नेपाल र श्रीलंकाबीचको खेल टससमेत हुन नपाई रद्द भएको हो। खेल हुन नसकेपछि उच्च वरीयताको टोलीलाई अघि बढाउने नियमअनुसार श्रीलंका सेमिफाइनलमा पुगेको छ।
टी–२० विश्व वरीयतामा श्रीलंका नवौँ र नेपाल १४औँ स्थानमा रहेको छ। यसअघि नेपालले समूह चरणको पहिलो खेलमा अफगानिस्तानलाई ५ विकेटले हराएको थियो।
जापानसँगको दोस्रो खेल भने वर्षाका कारण १५ ओभरमा छोट्याइएको थियो। नेपालले ४ विकेट गुमाएर १४९ रन बनाए पनि वर्षाका कारण जापानले ब्याटिङ गर्न नपाएपछि खेलको नतिजा आउन सकेन।
यससँगै लगातारको वर्षाका कारण नेपालको एसियाली खेलकुदमा क्रिकेट यात्रा क्वार्टरफाइनलमै टुंगिएको छ ।
