काठमाडौं । बंगलादेश प्रिमियर लिग (बीपीएल)मा सन्दीप लामिछाने आबद्ध राजशाही वारियर्स पराजित भएको छ ।
राजशाहीले शुक्रबार भएको रोमाञ्चक खेलमा चटोग्राम रोयल्ससँग दुई विकेटको हार व्यहोरेको छ ।
साइलेटमा भएको खेलमा राजशाहीले दिएको १२९ रनको लक्ष्य चटोग्रामले दोस्रो इनिङको अन्तिम बलमा आठ विकेट गुमाएर पूरा गर्यो ।
चटोग्रामका हसन नवाजले अविजित ३५ रन जोडे । कप्तान मेहदी हसनले २८ रन बनाए । आसिफ अलीले २७ र एडम रोसिङ्टनले १७ रन थपे ।
राजशाहीबाट बिनुरा फर्नान्डोले सर्वाधिक तीन विकेट लिए । एसएम मेहेरोबले दुई विकेट लिए ।
यस्तै, नेपाली स्पिनर सन्दीप लामिछाने, रिपोन मोन्डल र तान्जिम हसन साकिबले समान एक विकेट लिए ।
त्यसअघि, टस हारेर ब्याटिङमा उत्रिएको राजशाहीले निर्धारित २० ओभरमा नौ विकेट गुमाएर १२८ रन बनाएको थियो ।
राजशाहीबाट ब्याटिङको अवसर समेत पाएका नेपाली राष्ट्रिय टिमका स्पिनर सन्दीप लामिछानले पाँच रन बनाए ।
१०औँ नम्बरमा क्रिजमा आएका सन्दीपले अन्तिम दुई ओभर ब्याटिङ गरेका थिए । उनले सात बलको सामना गर्दा बाउन्ड्री भने प्रहार गर्न सकेनन् ।
राजशाहीका मुहम्मद वसिम र एसएम मेहेरोबले समान १९ रन जोडे । अकबर अलीले १७, मुस्ताफिकर रहिमले १५, तान्जिम हसन साकिबले १४ र र्यान बर्लले ११ रन थपे ।
चटोग्रामका अमर जमिलले तीन विकेट लिए । चार ओभरमा उनले २३ रन मात्र खर्चिए । तान्विर अस्लम र सोरिफुल इस्लामले समान दुई विकेट लिए । मेहदी हसन र हसन नवाजले एकरएक विकेट लिए ।
प्रतियोगितामा चटोग्राम शीर्षस्थानमा छ । चटोग्रामले सात खेलबाट १० अंक जोडेको छ । चौथो स्थानको राजशाहीले ६ खेलबाट आठ अंक नै जोडेको छ ।
