काठमाडौं । ओपनर क्रिस लिनको अर्धशतकप्रेरित सुदूरपश्चिम रोयल्सले नेपाल प्रिमियर लिग (एनपीएल)मा चितवन राइनोजविरुद्ध १७० रनको लक्ष्य प्रस्तुत गरेको छ ।
बिहीबार कीर्तिपुरस्थित त्रिवि क्रिकेट रंगशालामा टस हारेर ब्याटिङमा आएको सुदूरपश्चिमले निर्धारित २० ओभरमा चार विकेट गुमाएर १६९ रनको योगफल खडा गरेको हो ।
सुदूरपश्चिमका लिनले सर्वाधिक ७५ रन बनाए । उनले ५६ बलमा पाँच चौका र तीन छक्का प्रहार गरे । लिन १७औँ ओभरको समाप्तिसँगै ‘रिटायर्ड हर्ट’ भएका थिए ।
लिनले ९२–४ को स्थितिबाट आरिफ सेखसँग पाँचौँ विकेटका निम्ति ४५ रनको साझेदारी गरेका थिए ।
आरिफले १६ बलमा दुई चौका र एक छक्कासहित अविजित २६ रन थपे । ओपनर विनोद भण्डारीले १७ बल खेल्दा दुई चौका र एक छक्कासहित २१ रन बनाए । पुनित मेहराले १३ रन जोडे । दीपेन्द्रसिंह ऐरी १४ बलमा दुई चौकासहित २४ रनमा अविजित रहे ।
चितवनका सैफ जैबले दुई विकेट लिए । जर्ज स्क्रिमस र रञ्जित कुमारको नाममा एक–एक विकेट रह्यो ।
प्रतियोगितामा सुदूरपश्चिमले प्लेअफ यात्रा तय गरिसकेको छ । सुदूरले आजको खेलमा जित निकाले शीर्ष स्थान सुनिश्चित गर्नेछ । पाँच खेलमा १० अंक जोडेको सुदूरपश्चिम तालिकाको शीर्ष स्थानमा छ । यता, चितवन भने प्लेअफ दौडमा कायम रहन जितको दबाबमा छ । तालिकाको छैटौँ स्थानमा रहेको चितवनले पाँच खेलबाट चार अंक जोडेको छ ।
यसअघि आजै भएको पहिलो खेलमा काठमाण्डू गोर्खाजले पोखरा एभेन्जर्सविरुद्ध १३ रनको जित निकालेको थियो ।
