काठमाडौं । नेकपा एकीकृत समाजवादीका सम्मानित नेता झलनाथ खनालले एमाले अध्यक्ष केपी शर्मा ओलीले घर फर्कन गरेको आह्वानबारे टिप्पणी गरेका छन् ।
सुकेधारामा आयोजित आफू पक्षीय छुट्टै भेलामा पुगेका खनाललाई सञ्चारकर्मीले ओलीले गरेको आह्वानबारे प्रश्न गरेका थिए ।
एकीकृत समाजवादी फुट्ने भएपछि ओलीले शुक्रबार साँझ पार्टी छाडेकाहरूलाई घर फर्कन आह्वान गरेका थिए ।
ओलीको उक्त आह्वानबारे सञ्चारकर्मीले सोधेको प्रश्नमा ठट्यौली जवाफ दिँदै खनालले भने, ‘हामी कोही पनि वनमा छैनौं । घरमै छौं ।’
खनालले घर फर्कनका लागि ढोका राम्रोसँग खोल्नुपर्ने र बस्ने ठाउँहरू समेत राम्रो बनाउनुपर्ने बताए ।
खनालले एमालेमा फर्कन ओलीले गरेको आह्वानलाई सकारात्मक रुपमा लिँदै त्यसका लागि ४ वटा शर्त समेत अघि सारेका थिए ।
उनले ती शर्ततर्फ इंकित गर्दै यस्तो बताएका हुन् । ‘ढोका राम्रोसँग उदांगो पारेर खोल्नुपर्यो । बस्ने ठाउँहरू राम्रोसँग बनाउनुपर्यो । त्यो भयो भने फर्कने के समस्या भयो र रु,’ उनले भने ।
माओवादी केन्द्रसँग एकता गर्ने निर्णय पार्टीले गरेपछि खनाल असन्तुष्ट बनेका थिए । उनले कम्युनिष्ट एकता बेला बेलामा टुक्राटुक्रा भएको र सिंगो हुनका लागि टुक्रा भएको जिकिर गरे ।
