२५ बैशाख, काठमाडौं । जल तथा मौसम विज्ञान विभागले यस वर्षको मनसुनको प्रक्षेपण सार्वजनिक गरको छ ।
देशका अधिकांश क्षेत्रमा यो वर्ष गतवर्षको तुलनामा सरदरभन्दा कम वर्षा हुने जनाएको छ ।
मौसम पूर्वानुमान महाशाखाका आँकलनअनुसार यस वर्ष देशभर अधिकतम तथा न्यूनतम तापक्रम पनि सरदरभन्दा बढी रहने सम्भावना छ।
महाशाखाले गर्मी बढ्ने संकेत देखिएको जनाएको छ । कर्णाली प्रदेशका उत्तरी भूभाग तथा कोशी प्रदेशका उत्तरी क्षेत्रमा भने सरदर वर्षा हुने सम्भावना रहनेछ ।
त्यस्तै कर्णाली प्रदेशका दक्षिणी भूभाग, लुम्बिनी प्रदेशका अधिकांश क्षेत्र, मधेश प्रदेशका पूर्वी भूभाग तथा कोशी प्रदेशका दक्षिणी क्षेत्रमा सरदरभन्दा कम वर्षा हुने सम्भावना ५५ देखि ६५ प्रतिशतसम्म रहेको जनाइएको छ ।
सुदूरपश्चिम प्रदेशका अधिकांश भूभाग, मधेश प्रदेशका पश्चिमी क्षेत्र तथा कोशी प्रदेशका मध्य भूभागमा पनि सरदरभन्दा कम वर्षा हुने सम्भावना ४५ देखि ५५ प्रतिशतसम्म रहेको महाशाखाले जनाएको छ ।
