काठमाडौं, जेठ ५- बलात्कार मुद्दामा सफाई पाएसँगै सन्दीप लामिछाने विश्वकप क्रिकेटकाे तयारीमा व्यस्त छन् । अमेरिका र वेस्ट इन्डिजमा जुन २ बाट हुने टि–२० विश्वकप क्रिकेटमा सन्दीपलाई सहभागी गराउने तयारी नेपाल क्रिकेट संघ (क्यान) को छ ।
सफाईपछि क्यानले सन्दीपको निलम्बन पनि फुकुवा गरिसकेको छ । केहीदिनमा उनलाई अमेरिका पठाउने तयारी पनि भइरहेको क्यानले जनाएको छ ।
यस्तोमा सन्दीप कीर्तिपुरस्थित त्रिवि क्रिकेट मैदानमा अभ्यास गरिरहेका छन् । नेटमा बलिङ अभ्यास गरिरहेका सन्दीपलाई ब्याटर लोकेश बमले सघाइरहेका छन् ।
यस्तै विनोद भण्डारी, शरद भेषावकर, मौसम ढकालले पनि उपस्थित भएर सन्दीपलाई सघाइरहेका देखिन्छ । यसैबीचमा शनिबार क्यानका सचिव पारस खड्का सन्दीपको तयारी हेर्न पुगेका थिए ।
राष्ट्रिय क्रिकेट टोलीका पूर्व कप्तान समेत रहेका खड्का अभ्यासस्थलमा पुगेर बलिङ टिप्सहरू दिइरहेका छन् ।
