काठमाडौं । नेकपा (एमाले) का अध्यक्ष केपी शर्मा ओलीले सार्वजनिक सम्पती जलाउनेलाई कारबाहीको दायरामा ल्याउने बताएका छन्।
बुधवार गृह जिल्ला झापामा जेनजी आन्दोलनका क्रममा आगजनी र तोडफोड भएका संरचनाको अवलोकन गर्दै अध्यक्ष ओलीले अपराधिक गतिविधिलाई दुरुत्साहन गर्न नहुने बताए। ‘अपराध गर्नेहरूलाई कारबाहीको दायरामा ल्याउनुपर्छ। अरुको घर जलाएर छोडिदिन पाइन्छ ?,’ उनले प्रश्न गरे।
सार्वजनिक सम्पती, नगरपालिका, राजनीतिक कार्यकर्ताको घर जलाउनेहरू कानूनअनुसार दोषी रहेको उनको भनाइ थियो। आपराधिक गतिविधि गर्नेहरूलाई कारबाही हुनुपर्ने र अपराधलाई दुरुत्साहन गर्न नसकिने उनले बताए।
‘राष्ट्रिय सम्पती, सार्वजनिक सम्पती, नगरपालिका, राजनीतिक कार्यकर्ताको घर, कार्यालय जलाउने कुरा आपराधिक गतिविधि हुन्। अपराधलाई प्रोत्साहन गर्न सकिँदैन। अपराध रोक्नुपर्छ,’ ओलीले भने।
अपराध रोकेर शान्तिपूर्ण र बस्न लायकको देश बनाउनुपर्ने उनले बताए।
अन्तरिम सरकार देश जलाउनेहरुकै भएकाले पनि अपराधीहरुलाई कारबाही नगरेको उहाँको जिकिर छ। ‘अहिलेको सरकार सायद उनीहरूकै सरकार हो। त्यसकारण उनीहरूलाई जोगाउने काम गरेको छ,’ ओलीको आरोप थियो।
आगामी प्रतिनिधि सभा सदस्य निर्वाचनका लागि अध्यक्ष ओली उम्मेदवारी दर्ता गर्न सोमबार झापा गएका थिए। उनले झापा-५ बाट उम्मेदवारी दिएका छन् ।
