ललितपुर, जेठ ६- ललितपुरको बाफलमा आगलागीमा परी घाइते भएका सञ्जय गिरीको पनि मृत्यु भएको छ । भेन्टिलेटरमा उपचार गराइरहेका भएका सञ्जयको उपचारका क्रममा शनिबार किष्ट अस्पतालमा मृत्यु भएको हो ।
वैशाख २३ गते ललितपुर महानगरपालिका वडा नम्बर १७ बाफलस्थित टिनले छाएको टहरामा आगलागी हुँदा एकै परिवारका पाँच जना घाइते भएका थिए ।
योसँगै मृत्यु हुनेको संख्या चार पुगेको छ ।
सञ्जयकी श्रीमती रूपाको पनि उपचारका क्रममा वैशाख ३१ गते किष्ट अस्पतालमै मृत्यु भएको थियो ।
उनीहरूका दुई जना छोरीहरू ८ वर्षीया अलिसा र ४ वर्षीया प्रियाको पनि उपचारकै क्रममा वैशाख २४ गते मृत्यु भएको थियो ।
भतिज नाता पर्ने नित गिरी भने सामान्य घाइते छन् । उनको पनि किष्ट अस्पतालमा उपचार भइरहेको एसपी सुवेदीले जानकारी दिए ।
मोबिल खन्याइरहँदा लाइटर बालेपछि आगलागी भएको थियो ।
