काठमाडाैं, असाेज १६ – एसियन गेम्सको पुरुष क्रिकेटमा नेपाल र भारत आज भिड्दैछन् ।
नेपाली समय अनुसार बिहान पौने ७ बजे दुवै टोलीबीचको प्रतिस्पर्धा सुरु हुनेछ । समूह चरणका दुवै खेलमा जित निकाल्दै नेपाल क्वाटरफाइनल प्रवेश गरेको हो । भारतले सिधैं अन्तिम ८ मा स्थान पाएको थियो ।
नेपालले समूह चरणमा मंगोलिया र माल्दिभ्समाथि शानदार जितसहित नकआउट चरणमा स्थान बनाएको हो । चीनमा नेपाल उत्कृष्ट लयमा देखिन्छ ।
कुशल मल्ल, कप्तान रोहित पौडेलसहितका खेलाडी उत्कृष्ट फर्ममा देखिन्छन् । अघिल्लो दुई खेलमा उत्कृष्ट प्रदर्शन गरेको नेपाली टिमलाई हान्जाओको पिचले सहयोग पुर्याउने अपेक्षा गरिएको छ ।
युवा स्टार खेलाडीलाई समावेश गर्दै एसियन गेम्समा पठाएको भारतले स्वर्ण पदकलाई मुख्य लक्ष्य बनाएको छ । पछिल्लो संस्करणको इन्डियन प्रिमियर लिग क्रिकेट आईपीएलमा उम्दा प्रदर्शन गरेका खेलाडीलाई भारतले टिममा स्थान दिएको छ ।
दुवै टिम जित निकाल्दै सेमिफाइनलमा स्थान पक्का गर्ने योजनामा हुनेछन् । नेपालले समूह चरणका दुवै खेलमा २ सयभन्दा बढी रन बनाएकाले भारतविरुद्ध उत्कृष्ट ब्याटिङको अपेक्षा गरिएको छ ।
