काठमाडौं, साउन १२– श्रम, रोजगार तथा सामाजिक सुरक्षा मन्त्रालयले तोकेको भन्दा बढी शुल्क लिएर वा फर्जी कागजात बनाएर वैदेशिक रोजगारीमा नपठाउन सम्बन्धित म्यानपावर कम्पनीलाई निर्देशन गरेको छ । आज मन्त्रालयले एक प्रेष विज्ञप्ति जारी गर्दै पछिल्लो समय यस्ता खाले ठगी बढेको भन्दै यस्तो नगर्न सचेत गराएको हो ।
नियमअनुसार मलेसिया लगायत खाडी देशमा शून्य लागतमा कामदार पठाउनुपर्नेमा ठूलो रकम लिएर पठाउने गरेको, गलत तवरले रकम असुल्ने गरेको, कामदारको फर्जी मेडिकल जाँच गरेको मन्त्रालयले जनाएको छ । यस्तै, विदेश जानुपूर्व अनिवार्य रुपमा लिनुपर्ने अभिमुखीकरण तालिममा सहभागी नभएकाहरुलाई पनि सहभागी भएको भनेर कागज पेस गर्ने लगायतका विकृतिहरु बढेको भन्दै आफ्नो ध्यानाकर्षण भएको मन्त्रालयको विज्ञप्तिमा उल्लेख छ ।
यस्ता गैरकानुनी र अमर्यादित क्रियाकलाप नियन्त्रणको लागि मन्त्रालय तथा विभागबाट शुक्ष्म रुपमा अनुगमन र अनुसन्धान भइरहेको पनि मन्त्रालयले जनाएको छ ।
यदि कसैलाई विदेश पठाउन कुनै म्यानपावर वा व्यक्तिले रकम मागेमा, फर्जी कागजात बनाउन लगाएमा, ठगीमा परेमा वा वैदेशिक रोजगार सम्बन्धी समस्यामा परेमा मन्त्रालयको कल सेन्टरमा सम्पर्क गर्न सकिन्छ ।
मन्त्रालयमा रहेको कल सेन्टर ११४१ र १६६००१५०००५ तथा फेसबुक पेज www.facebook.com/molcallcenter र वैदेशिक रोजगार विभागको नम्बर ०१४७९२६४८ मा सम्पर्क गरेर आफ्ना गुनासो तथा उजुरी टिपाउन सकिने पनि मन्त्रालयले जनाएको छ ।
