काठमाडौं, साउन ७- काठमाडौंको सुन्दरीजल खोलामा खसेर एक जना किशोर बेपत्ता भएका छन् । साथीहरुसँग घुम्न गएका काठमाडौंको कपन घर भएका १६ बर्षिय शुभम श्री प्रधान खोलामा खसेर बेपत्ता भएको प्रहरीले जनाएको छ ।

प्रधान अपराह्न सवा ४ बजे खोलामा खसेका हुन् ।

फोटो खिचाउनको लागि ढुंगामा बस्दा चिप्लिएर खोलामा खसेको प्रहरीले बताएको छ । शनिबार विहान शिवपुरी राष्ट्रिय निकुञ्जभित्र पर्ने सुन्दरीजलमा उनीसहित सात युवाहरू घुम्न गएका थिए ।

अहिले किशोरको खोजी भइरहेको छ । घटनास्थलमा प्रहरी वृत्त बौद्धबाट प्रहरी नायब उपरीक्षक ढुन्डीराज न्यौपानेको टोली खटिएको छ ।