काठमाडौं, वैशाख २१- बागमती प्रदेशका मुख्यमन्त्री सहित तीन मन्त्रीद्वारा कागेश्वरी मनोहरा नगर अस्पतालको एकसाथ अवलोकन गर्नुभएको छ । आईतबार बागमती प्रदेशका मुख्यमन्त्री इन्द्रबहादुर बानियाँ, आर्थिक मामिला तथा योजना मन्त्री प्रभात तामाङ र खानेपानी मन्त्री कृष्ण कुमार तामाङको उच्चस्तरीय टोलीले अवलोकन गरेको हो ।

प्रदेश प्रमुख सहितको उपस्थितिमा सम्पन्न अवलोकन तथा सुपरिवेक्षण कार्यक्रमले अस्पताललाई थप ऊर्जा, आत्मविश्वास र आशा प्रदान गरेको छ। कागेश्वरी मनोहरा नगर अस्पतालले प्रदेश नेतृत्वको प्रत्यक्ष चासो, ऐक्यबद्धता र स्पष्ट प्रतिबद्धतासँगै आफ्नो विकास यात्रामा नयाँ उचाइतर्फ अग्रसर हुने संकेत देखाएको छ।

उक्त अवसरमा प्रदेश नेतृत्वले अस्पतालका विभिन्न सेवा इकाइहरू—प्रयोगशाला, स्वास्थ्य बीमा सेवा, आपतकालीन कक्ष, ओपीडी सेवा तथा समग्र व्यवस्थापन प्रणाली—को स्थलगत निरीक्षण गर्दै सेवा प्रवाहको गुणस्तरबारे प्रत्यक्ष जानकारी लिएका थिए। सीमित स्रोतसाधनका बाबजुद पनि अस्पतालले नागरिकलाई निरन्तर सेवा दिइरहेकोप्रति उनीहरूले खुलेर प्रशंसा व्यक्त गरेका थिए। विशेषगरी स्वास्थ्य बीमा कार्यक्रममार्फत सर्वसाधारणले सहज रूपमा उपचार पाइरहेको अवस्था र सेवाग्राहीमा देखिएको विश्वासले नेतृत्वलाई सकारात्मक रूपमा प्रभावित बनाएको थियो।

अवलोकनकै क्रममा अस्पतालको दीर्घकालीन विकासलाई केन्द्रमा राखी तयार गरिएको ‘नयाँ भवन गुरुयोजना (Master Plan)’ प्रस्तुत गरिएको थियो। उक्त योजनामा आधुनिक पूर्वाधारसहित सेवा विस्तार, विशेषज्ञ सेवा सञ्चालन र दीर्घकालीन स्वास्थ्य संरचना विकासका स्पष्ट लक्ष्यहरू समेटिएका छन्। मुख्यमन्त्री बानियाँले उक्त योजनाप्रति विशेष चासो देखाउँदै प्रदेश सरकारको तर्फबाट आवश्यक सहयोग, समन्वय र सहकार्यका लागि प्रतिबद्धता जनाएका छन्। यसले स्थानीय तह र प्रदेश सरकारबीच सहकार्यमा आधारित विकास अवधारणालाई थप बलियो बनाएको छ।

कार्यक्रममा नगर प्रमुख, उप–प्रमुख तथा अस्पताल व्यवस्थापन समितिका पदाधिकारीहरूले अस्पताल स्थापना कालदेखि हालसम्मको संघर्षपूर्ण यात्रा, सीमित स्रोतबीच सेवा विस्तारका प्रयास र नागरिक स्वास्थ्यमा परेको सकारात्मक प्रभावबारे विस्तृत जानकारी प्रस्तुत गरेका थिए। साथै कार्यकारी निर्देशक तथा मेडिकल सुपरिटेन्डेन्टले अस्पतालको भावी योजना, सेवा विस्तारको मार्गचित्र तथा आधुनिक स्वास्थ्य सेवातर्फको दृष्टिकोण प्रस्तुत गरेका थिए, जसले आगामी दिनमा अस्पताललाई थप व्यवस्थित र सक्षम बनाउने दिशामा स्पष्ट संकेत दिएको छ।

कार्यक्रम केवल औपचारिकतामा सीमित नभई प्रदेश नेतृत्वले अस्पतालको सेवा प्रणालीलाई नजिकबाट बुझ्ने, बिरामी तथा सेवाग्राहीसँग प्रत्यक्ष संवाद गर्ने र व्यवस्थापनको व्यवहारिक अवस्था बुझ्ने प्रयास गरेको देखिएको थियो। उनीहरूको आत्मीयता र सक्रिय सहभागिताले अस्पताल परिवार मात्र होइन, सम्पूर्ण नगरवासीलाई उत्साहित र आशावादी बनाएको छ।

कार्यक्रमको अन्त्यतिर नगर नेतृत्वले अस्पतालका तत्कालीन आवश्यकता र चुनौतीहरूतर्फ प्रदेश सरकारको गम्भीर ध्यानाकर्षण गराएको थियो। विशेषगरी अत्यावश्यक शल्यक्रिया कक्ष (OT) को अभाव, १०० शय्यामा स्तरोन्नति भइसके पनि त्यसअनुसारको भौतिक पूर्वाधार नहुनु, दक्ष जनशक्ति कमी तथा आधुनिक उपकरणहरूको अभावजस्ता विषयहरूलाई प्राथमिकताका साथ उठाइएको थियो। बढ्दो बिरामी चाप र नागरिक अपेक्षालाई ध्यानमा राख्दै अस्पताललाई पूर्ण क्षमतायुक्त, आधुनिक र गुणस्तरीय स्वास्थ्य संस्थाका रूपमा विकास गर्न प्रदेश सरकारको विशेष सहयोग अपरिहार्य रहेको धारणा व्यक्त गरिएको छ।

समग्रमा, स्वास्थ्य सेवा केवल उपचारको विषय मात्र नभई नागरिकको आधारभूत अधिकार, विश्वास र राज्यप्रतिको अनुभूतिसँग प्रत्यक्ष जोडिएको विषय हो। कागेश्वरी मनोहरा नगर अस्पतालप्रति प्रदेश नेतृत्वले देखाएको चासो, प्रतिबद्धता र ऐक्यबद्धताले आगामी दिनमा यस अस्पताललाई एक नमूना, प्रभावकारी र विश्वासिलो स्वास्थ्य केन्द्रका रूपमा स्थापित गर्ने विश्वासलाई थप मजबुत बनाएको छ।