१ भदौ, काठमाडौं । भारतको बिहार राज्यस्थित लखिसरायको अशोकधाम मन्दिरमा भागदौडजस्तै स्थिति उत्पन्न हुँदा सात जनाको मृत्यु भएको खबर छ।
लखिसरायका सब-डिभिजनल पुलिस अफिसर (एसडीपीओ) शिवम कुमारले बीबीसीलाई टेलिफोनमा दिएको जानकारीअनुसार सोमबार बिहान अशोकधाम मन्दिरमा यो दुर्घटना भएको हो।
शिवम कुमारका अनुसार दुर्घटनामा हालसम्म सात जनाको मृत्यु भइसकेको छ। घटनामा ५ देखि ६ जना घाइते भएका छन् र उनीहरूलाई उपचारका लागि सदर अस्पतालमा भर्ना गरिएको छ।
लखिसरायका जिल्लाधिकारी (डीएम) शैलेन्द्र कुमार घाइतेहरूलाई भेट्न सदर अस्पताल पुगेका थिए। उनले त्यहाँ सञ्चारकर्मीहरूलाई घटनाबारे विस्तृत जानकारी गराए। उनले मृत्यु हुने सबै सातै जना महिला रहेको बताए।
उनले भने, ‘अशोकधाम हल्ट रेलवे स्टेसनको ठीक अगाडिदेखि मन्दिरसम्म दर्शनार्थीहरूको लामो लाइन लागेको थियो। त्यही समयमा स्टेसनमा दुई वटा रेलहरू पनि आइपुगे। यसैबिच, बिजुलीको खम्बा ढलेको हल्ला फैलियो, जबकि केवल बिजुलीको तार मात्र टुटेको थियो। त्यसपछि देब्रेतर्फ लागेको महिलाहरूको लाइनमा अत्यधिक चाप (दबाब) सिर्जना भयो र महिलाहरू एक-अर्कामाथि लड्दै गए।’
प्रशासनिक अधिकारीहरू घटनास्थल पुगिसकेका छन् र उद्धार कार्यका साथै भिड नियन्त्रणको व्यवस्थापनको निगरानी गरिरहेका छन्। अधिकारीहरूका अनुसार स्थितिको निरन्तर अनुगमन भइरहेको छ।
समाचार एजेन्सी पीटीआईका अनुसार एक प्रत्यक्षदर्शीले भनिन्, ‘हामी महिलाहरू लाइनमा उभिएका थियौँ। हामी लड्यौँ र करिब २० देखि २५ जना महिलाहरू एक-अर्कामाथि लडे। भिडको मुनि थिचिएर धेरै महिलाहरू बेहोस भए। म पनि बेहोस भएकी थिएँ। यो सबै अत्यधिक भिड भएका कारण भएको हो।
