काठमाडौं । नेकपा एमालेका अध्यक्ष केपी शर्मा ओलीले वर्तमान सरकारलाई राष्ट्रिय स्वतन्त्र पार्टी(रास्वपा)को सरकार भन्ने आशयको टिप्पणी गरेका छन् । बिहीबार झापा-५ मा पत्रकारसँग कुराकानी गर्दै ओलीले यस्तो टिप्पणी गरेका हुन् ।
चुनावी कार्यक्रमकै दौरानमा पत्रकारले ओलीसँग ‘रास्वपाले त दुई तिहाइको सरकार बनाउने भन्दैछ नि ?’ भनेर सोध्दा ओलीले भनेका छन्, ‘होइन, २१ गते अघि त रास्वपाको मात्रै सरकार छ नि ! उसैको मात्र सरकार छ । सिंगै छ नि !’
तर, फागुन २१ गतेपछि भने रास्वपाको सरकार नबन्ने उनले दाबी गरे । ‘२१ गतेपछि रहन्न । बाङ्ग्लादेश देख्नुभएन,’ ओलीले भने ।
यस्तै झापा–५ मा रास्वपाका वरिष्ठ नेता बालेन्द्र शाहले ३० हजार मतान्तरले हराउने दाबी गरेको विषयमा पनि ओलीले प्रतिक्रिया दिएका छन् ।
‘देख्या हो भने सपना हो, नदेख्या भए कविता हो । त्यो कुरा गलत हो,’ ओलीले भने । आफू झापा–५ मा २०र२५ हजार मतान्तरले जित्ने उनले बताए ।
आफूविरुद्ध लड्ने एक जना बालेन मात्र नयाँ नभई बाँकी सबै उम्मेदवार नयाँ नै रहेको उनले बताएका छन् ।
