काठमाडौं, असार २९- नवलपरासी पूर्वको गैँडाकोट-१० मा दुई जनाको शव भेटिएको छ । नारायणी नदी किनारमा ती शव भेटिएको प्रहरीले जनाएको छ ।
फेला परेका शव सिमलताल घटनाका रहेको अनुमान गरिएकाे छ । यद्यपि प्रहरीले पुष्टि गरेको छैन । सनाखत भएपछि पुष्टि गर्न सकिने प्रहरीले जनाएको छ ।
एउटा शव बालुवामा पुरिएको अवस्थामा र एउटा शव तैरिएको अवस्थामा भेटिएको थियो ।
चितवनको भरतपुर महानगरपालिका–२९ स्थित सिमलतालमा पहिरो खस्दा शुक्रबार दुई वटा डिलक्स गाडी त्रिशूलीमा खसेका थिए । एन्जल वीरगन्जबाट काठमाडौँतर्फ र गणपति काठमाडौँबाट रौतहटको गौरतर्फ जाँदै गरेको अवस्थामा पहिरोमा परेका थिए ।
बेपत्ता बस र यात्रुको खोजी कार्य चलिरहेको छ । यसअघि एक जना भारतीय नागरिकको शव फेला परेकाे थियाे । उक्त शव साेही घटनामा परेका बसमा सवार यात्रीकाे रहेको पुष्टि भइसकेकाे छ ।
