काठमाडौं, फागुन ११– नेकपा एमालेका अध्यक्ष एवं पूर्व प्रधानमन्त्री केपी शर्मा ओली ७२ वर्ष पुगेका छन् । उनले आज ७३औँ जन्मदिन मनाउँदैछन् ।

७३ औं जन्मदिनको पूर्वसन्ध्यामा ओलीले एक भिडियो सन्देश जारी गर्दै यस वर्ष सामान्य रुपमा जन्मदिन मनाउन चाहेको उल्लेख गरेका हुन् ।

उनले कसैलाई पनि केक बोकेर नआउन आग्रह गरेका छन् । यसअघि जन्मघर तेह्रथुम पुगेर नेपालको नक्सासहितको केक काटेका ओलीले यस वर्ष भने जन्मदिन धेरै धुमधामसँग नमनाउने बताएका हुन् ।

उनले आफूलाई शुभकामना दिन सक्ने तर केक नल्याउन शुभेच्छुकलाई आग्रह गरेका छन् । विक्रम सम्बत् २००७ साल फागुन ११ गते तेह्रथुमको आठराईमा जन्मिएका ओली नेकपा एमालेका अध्यक्ष हुन् । उनी तीन पटक प्रधानमन्त्री भइसकेका छन् ।