एजेन्सी, भदौ ३-पाकिस्तानको हाफिजावाद जिल्लास्थित पिण्डी भट्टियान नजिकै राजमार्गमा डिजेल ढुवानी गरिरहेको पिकअप ट्रकसँग यात्रुवाहक बस ठोक्किएर आगलागी हुँदा १६ जनाको मृत्यु भएको छ ।
जिल्ला प्रहरी अधिकृत फहाद अहमदका अनुसार यात्रुवाहक बस कराचीबाट इस्लामाबादतर्फ जाँदै गर्दा आइतबार अपराह्न ४:३० मा दुर्घटनामा परेको थियो । दुर्घटनामा दुवै सवारीसाधनका चालकको मृत्यु भएको प्रहरीको हवाला दिँदै पाकिस्तानी सञ्चारमाध्यम डनन्युजले जनाएको छ ।
साथै दुर्घटनामा केही यात्रु घाइते भएका छन् । उनीहरूलाई उपचारका लागि फैसलावादस्थित अस्पतालमा लगिएको छ । तीमध्ये केहीको अवस्था गम्भीर रहेको बताइएको छ । दुर्घटनास्थलबाट १५ यात्रुलाई भने सकुशल उद्धार गरिएको छ ।
प्रहरीको प्रारम्भिक अनुसन्धानको क्रममा बस चालकको लापर्वाहीका कारण दुर्घटना भएको बुझिएको छ । साथै घटनाबारे छानबिन गर्न २४ घण्टाभित्र प्रतिवेदन बुझाउने गरी एक समिति पनि बनाइएको छ ।
