काठमाडौं, साउन २१- नेपाल समाजवादी पार्टीको अध्यक्षमा डा. बाबुराम भट्टराई र महेन्द्रराय यादव चयन भएका छन् ।
पार्टीको शनिबार ललितपुरमा बसेको बैठकले दुवैलाई केन्द्रीय समितिको अध्यक्षमा चयन गरेको हो । पार्टी सहअध्यक्षमा गंगानारायण श्रेष्ठ, उपाध्यक्षमा दुर्गा सोब, हिसिला यमी र भक्तबहादुर शाहलाई चयन भएका छन् । यस्तै महासचिवमा रमेश यादवलाई चयन गरेको छ ।
बैठकले सातवटा भौगोलिक, एक गैरभौगोलिक र प्रवास गरी ९ प्रदेशको नेतृत्वलाई केन्द्रीय कार्यकारिणी समितिमा थपेको छ ।
प्रदेश १ को इन्चार्जमा राजेन्द्र किराती, मधेशमा देवेन्द्र यादव, बागमतीमा अक्लबहादुर थिङ, गण्डकीमा मोती रिजाल, लुम्बिनीमा कमल खनाल, सुदूरपश्चिममा डा. जनक शाह, कर्णालीमा देवी बहादुर बुढाथोकी चयन भएका छन् ।
गैरभौगोलिकमा ईश्वर रिजाल र प्रवासमा जीएस गुरुङ रहेका छन् । पार्टीको विधानमा व्यवस्था गरिएको संघीय परिषद् अध्यक्ष पद भने खाली राखेको छ ।
बैठकले हाल १८९ सदस्यीय केन्द्रीय सदस्य बनाएको छ ।
