काठमाडौं, साउन १०- नेकपा (माओवादी केन्द्र)ले आसन्न संसदीय निर्वाचनपछि मात्रै पदाधिकारी चयन हुने भएको छ ।
समाजवादी केन्द्र निर्माणको वहसका कारण पदाधिकारी चयनमा ढिलाइ भएको माओवादीले जनाएको छ ।
पदाधिकारी नहुँदा पार्टीका कामकारबाहीमा कुनै अवरोध नभएको र अझै गृहकार्य आवश्यक रहेकाले पनि निर्वाचनअघि हुने सम्भावना नरहेको माओवादी केन्द्रका नेता वर्षमान पुनले जानकारी दिए ।
अध्यक्ष प्रचण्डले इच्छा नदेखाएका कारणले समेत पदाधिकारी चयनमा अलमल भइरहेको आरोप लाग्दै आएको छ । महाधिवेशन भएको ६ महिना बित्दा पनि माओवादीले पदाधिकारी टुंग्याउन सकेको छैन ।
माओवादी केन्द्रको विधानले एक अध्यक्ष, एक महासचिव, एक वरिष्ठ उपाध्यक्ष र ६ उपाध्यक्षको व्यवस्था गरेको छ । विधान अनुसार दुई उपमहासचिव, तीन सचिव र एक कोषाध्यक्ष रहनेछन् ।
माओवादी केन्द्रले नारायणकाजी श्रेष्ठलाई वरिष्ठ उपाध्यक्ष तोकेको छ । महासचिवमा पुन वा जनार्दन शर्मामध्ये कसलाई रोज्ने भन्नेमा अध्यक्ष प्रचण्डमा छन् ।
