३२ असार, काठमाडौं । सर्वोच्च अदालतले नेकपा (एमाले)का पूर्वसांसद लक्ष्मी महतो कोइरीलाई थुनामुक्त गर्न सरकारका नाममा आदेश जारी गरेको छ ।
सर्वोच्चका न्यायाधीशद्वय कुमार रेग्मी र श्रीकान्त पौडेलको संयुक्त इजलासले कोइरीलाई थुनामुक्त गर्न आज बन्दीप्रत्यक्षीकरणको आदेश जारी गरेको हो ।
थुनामुक्त गर्न जारी भएको आदेशको प्रति आजै महोत्तरीको जलेश्वरस्थित कारागार कार्यालयलाई पठाइएको छ ।
कोइरीको थुनामुक्तिका लागि उनका छोरा मनोजकुमार महतोले सर्वोच्च अदालतमा बन्दीप्रत्यक्षीकरण रिट दिएका थिए । पूर्वसांसद कोइरी मधेस आन्दोलनका क्रममा २०७२ सालमा भएको सशस्त्र प्रहरी सहायक निरीक्षक ९असई० थमन विक हत्या प्रकरणमा मुछिएका थिए ।
उच्च अदालत जनकपुरले यही असार १७ गते कोइरीलाई पाँच वर्ष कैद सजाय सुनाएको थियो । फैसलालगत्तै कोइरी असार १८ गते पक्राउ परेका थिए । सजाय भुक्तानका लागि जलेश्वर कारागार पठाएको थियो ।
कानुनतः पाँच वर्षभन्दा कम कैद तोकिएको कसुरमा थुनाबाहिरै रहेर मुद्दाको पुनरावेदन गर्न पाइने भए पनि गैरकानुनी रूपमा पक्राउ गरी थुनामा राखिएको प्रश्न उठाएर सर्वोच्चमा रिट परेको थियो ।
