काठमाडौं । इरानी हमलापछि अमेरिकाको एक एफ–३५ लडाकु विमानलाई बिहीबार आपतकालीन अवतरण गराइएको छ । सीएनएनले स्रोतहरूलाई उद्धृत गर्दै यससम्बन्धी रिपोर्ट सार्वजनिक गरेको छ ।
सेन्टकमका प्रवक्ताले के भने ?
अमेरिकी सेनाको मध्य कमान्ड (सेन्टकम)का प्रवक्ता क्याप्टेन टिम हकिन्सका अनुसार, यो पाँचौँ पुस्ताको लडाकु विमान इरानमाथि आफ्नो मिसनमा थियो । त्यही समय यसलाई मध्यपूर्वस्थित एक अमेरिकी एयरबेसमा आपतकालीन अवतरण गराउनुपरेको थियो ।
उनले विमान सुरक्षित रूपमा अवतरण भएको र घटनाको अनुसन्धान भइरहेको बताएका छन् । उनले पाइलटको अवस्था स्थिर रहेको बताए ।
युद्ध सुरु भएयता पहिलोपटक एफ–३५ निशानामा
फेब्रुअरीको अन्त्यमा युद्ध सुरु भएदेखि इरानले अमेरिकी विमानलाई निशाना बनाएको र एफ–३५ लाई आपतकालीन अवतरण गर्नुपरेको यो पहिलोपटक हो ।
एफ–३५ एक राडारलाई छल्न सक्ने लडाकु विमान हो, जसलाई अमेरिका र इजरायल दुवैले यस संघर्षमा प्रयोग गरिरहेका छन् । यसको मूल्य १०० मिलियन डलरभन्दा बढी पर्छ ।
रिभोलुसनरी गार्डले जारी गर्यो बयान र भिडियो
इरानको इस्लामिक रिभोलुसनरी गार्ड कर्प्सले मध्य इरानमाथि उडिरहेको अमेरिकी एफ–३५ लडाकु विमानमाथि हमला गरी त्यसलाई ‘गम्भीर क्षति’ पुर्याएको दाबी गरेको छ ।
विज्ञप्तिमा रिभोलुसनरी गार्डले उनीहरूको वायु रक्षा प्रणालीले बिहीबार दिउँसो करिब साढे दुई बजे एफ–३५ विमानलाई निशाना बनाएको जनाएको थियो । यो अपरेसन १२५ भन्दा बढी अमेरिकी–इजरायली ड्रोनहरूको सफल इन्टरसेप्सनपछि गरिएको पनि उनीहरूले बताएका छन् ।
रिभोलुसनरी गार्डका अनुसार, यस घटनाले देशको वायु रक्षा संयन्त्रमा भएको महत्वपूर्ण र विशेष सुधारलाई दर्शाउँछ ।
