काठमाडौं । सार्वजनिक पदको दुरुपयोग गरेको आरोपमा पक्राउ परेका बेलायतका राजा चार्ल्स तृतीयका भाइ तथा पूर्वराजकुमार एन्ड्रयूलाई बिहीबार साँझ रिहा गरिएको छ ।
यद्यपि, प्रहरीले उनलाई आरोपमुक्त नगरिएको र उनी अझै पनि अनुसन्धानको घेरामा रहेको स्पष्ट पारेको छ । आफ्नो ६६औँ जन्मदिनकै दिन पक्राउ परेका एन्ड्रयूमाथि कुख्यात यौन अपराधी जेफ्री एप्स्टिनलाई सरकारी गोप्य दस्तावेजहरू पठाएको आरोप छ ।
स्थानीय रिपोर्टहरूका अनुसार टेम्स भ्याली प्रहरीले उनलाई हिरासतमा लिएर करिब ११ घण्टासम्म सोधपुछ गरेको थियो । अधिकारीहरूले उनलाई अनुसन्धानकै क्रममा रिहा गरिएको बताएका छन् ।
टेम्स भ्याली प्रहरीले एक विज्ञप्तिमा ६० वर्षभन्दा माथिका एक व्यक्तिलाई सार्वजनिक पदमा दुराचार गरेको आशंकामा पक्राउ गरिएको र अहिले थप अनुसन्धानका लागि रिहा गरिएको जनाएको छ ।
ल्ःद्य द्यबलप
बेलायती परम्परा अनुसार प्रहरीले नाम सार्वजनिक नगरे पनि नोरफोकमा खानतलासीको प्रक्रिया पूरा भएको पुष्टि गरिएको छ । वास्तवमा, एन्ड्रयू विगत केही वर्षदेखि एपस्टिनसँगको आफ्नो सम्बन्धलाई लिएर आलोचनाको सामना गरिरहेका छन् ।
उनकी आमा रानी एलिजाबेथ द्वितीयकी पूर्वप्रेस सचिव एल्सा एन्डरसनले गिरफ्तारीपछि एन्ड्रयू स्तब्ध र विचलित देखिएको बताइन् । उनले यसलाई शाही परिवारको प्रतिष्ठामा भएको अभूतपूर्व क्षतिका रूपमा चित्रण गरिन् ।
पूर्व राजकुमारको गिरफ्तारीपछि राजा चार्ल्स तृतीयले विज्ञप्ति जारी गर्दै कानुनले आफ्नो काम गर्ने र परिवारले अनुसन्धान एजेन्सीहरूलाई पूर्ण सहयोग गर्ने बताएका थिए ।
उनले भने, “एन्ड्रयू माउन्टब्याटेन–विन्ड्सरसँग सम्बन्धित खबर अत्यन्तै चिन्ताको विषय हो । कानुनलाई आफ्नो बाटो लिन दिनुपर्छ ।”
यो अनुसन्धान अमेरिकी न्याय विभागले जारी गरेको कागजातपछि तीव्र भएको हो । जारी गरिएका दस्तावेजहरूमा एपस्टिनले सन् २०१० मा एन्ड्रयूका लागि एक रुसी युवतीसँग भेटघाटको व्यवस्था मिलाउने प्रस्ताव गरेको उल्लेख छ । अर्को एक दस्तावेजमा एन्ड्रयूले बकिंघम प्यालेसमा रात्रिभोजका लागि निमन्त्रणा दिएको उल्लेख गरिएको छ ।
यसका अतिरिक्त, दक्षिण–पूर्वी एसियाको व्यापार यात्रासँग सम्बन्धित विवरणहरू साझा गरिएको संकेत पनि मिलेको छ । एन्ड्रयूले भने सबै आरोपहरू अस्वीकार गरेका छन् ।
