काठमाडौं । पाकिस्तानको संघीय अनुसन्धान एजेन्सी (एफआईए)को विशेष अदालतले शनिबार त्यहाँका पूर्वप्रधानमन्त्री तथा पाकिस्तान तहरिक-ए-इन्साफ (पीटीआई)का संस्थापक इमरान खान र उनकी पत्नी बुसरा बिबीलाई १७ वर्षको जेल सजाय सुनाएको छ।
अदालतको आदेशको प्रतिलिपिबाट उद्धृत गर्दै डनले जनाएअनुसार दुवैलाई एक करोड ६४ लाख रुपैयाँ जरिवाना पनि गरिएको छ र त्यो तिर्न नसके थप जेल सजाय हुनेछ।
हाल रावलपिन्डीको अडियाला जेलमा रहेका इमरानलाई पाकिस्तान दण्ड संहिताको धारा ३४ (साझा इरादा) र ४०९ (आपराधिक विश्वासघात) अन्तर्गत १० वर्षको सश्रम कारावास र भ्रष्टाचार रोकथाम ऐनको धारा ५ (२) (सरकारी कर्मचारीहरूद्वारा आपराधिक दुर्व्यवहार) अन्तर्गत सात वर्षको सश्रम कारावासको सजाय सुनाइएको हो।
उनकी श्रीमती बुसरा बिबीलाई पनि सोही प्रावधानअन्तर्गत कुल १७ वर्षको जेल सजाय सुनाइएको समाचारमा उल्लेख छ।
यस वर्षको अक्टोबरमा इमरान र बुसरा बिबीले सबै अभियोग अस्वीकार गर्दै यो आफूहरूलाई राजनीतिबाट अयोग्य ठहर गर्ने मनगढन्त र राजनीतिक प्रतिशोध दाबी गरेका थिए।
डन पत्रिकाका अनुसार, पीटीआई संस्थापकले नीतिअनुसार उचित प्रक्रियाको पालना गरेको र प्रधानमन्त्री कार्यालय प्रोटोकल खण्डमा रिपोर्ट गरिएको, मूल्यांकन गरिएको र भुक्तानी राष्ट्रिय कोषमा जम्मा भएपछि कानुनी रूपमा राखिएको बताएका छन्।
