नयाँ दिल्ली । भारतको राजधानी नयाँ दिल्लीको व्यस्त क्षेत्रमा भएको एउटा भयानक कार विस्फोटलाई भारतीय सरकारले ‘आतङ्कवादी घटना’ भनेको छ।
सोमबार दिल्लीको ऐतिहासिक लाल किल्ला नजिकै भएको उक्त विस्फोटमा कम्तीमा आठ जनाको मृत्यु भएको छ भने २० जनाभन्दा बढी घाइते भएका छन्।
बुधबार राति भएको सुरक्षा बैठकमा प्रधानमन्त्री नरेन्द्र मोदीको मन्त्रिपरिषद्ले यो हमलाको निन्दा गर्दै यसलाई राष्ट्रविरोधी शक्तिहरूले गरेको ‘कायरतापूर्ण कार्य’ भनेको छ। अधिकारीहरूले घटनाको सम्बन्धमा अहिलेसम्म कसैको पनि नाम तोकेका छैनन् ।
मन्त्रिपरिषद्ले जारी गरेको प्रस्तावमा भनिएको छ, ‘देश कार विस्फोटमार्फत राष्ट्रविरोधी शक्तिहरूले गरेको जघन्य आतङ्ककारी घटनाको साक्षी बनेको छ। मन्त्रिपरिषद्ले घटनाका दोषी, उनीहरूका सहयोगी र प्रायोजकहरूलाई तत्काल पहिचान गरी न्यायको कठघरामा ल्याउनका लागि अनुसन्धानलाई अत्यन्तै द्रुतता र व्यावसायिकताका साथ अगाडि बढाउन निर्देशन दिन्छ।’
यो ‘निर्दयी र कायरतापूर्ण कार्य’ को निन्दा गर्दै मन्त्रिपरिषद्ले आतङ्कवादविरुद्ध शून्य सहनशीलताको नीतिप्रति भारतको अटल प्रतिबद्धता रहेको बताएको छ।
विस्फोट साँझ ६:५२ बजे लाल किल्ला नजिकैको मेट्रो स्टेसन नजिकै भएको थियो, जुन दिल्लीको एक महत्त्वपूर्ण स्थल हो।
दिल्ली प्रहरी आयुक्त सतिश गोल्चाका अनुसार एउटा सुस्त गतिमा चलिरहेको गाडी रातो बत्तीमा रोकिएपछि विस्फोट भएको थियो, जसले नजिकका सवारी साधनहरूमा क्षति पुगेको थियो। प्रहरी प्रवक्ताका अनुसार विस्फोट हुँदा हुन्डाई आई २० कारमा तीन जना सवार थिए ।
विस्फोटको खबर आउनासाथ दिल्ली प्रहरीले उच्च सतर्कता अपनाएको थियो। उत्तर प्रदेश लगायत छिमेकी राज्यहरूले पनि त्यस्तै सतर्कता अपनाएका छन्। गृह मन्त्री अमित शाहले सबै सम्भावनाहरूलाई ध्यानमा राखेर अनुसन्धान गरिने बताएका छन्।
