काठमाडौँ । रुसी राष्ट्रपति भ्लादिमिर पुटिनले नेपाल-रुस सम्बन्धमा कहिल्यै समस्या नआएको बताएका छन्।
चीनको थियानजिनमा सोमबार प्रधानमन्त्री केपी शर्मा ओलीसँग भएको भेटवार्तामा पुटिनले दुई देशबिच सन् १९५६ मा स्थापित कूटनीतिक सम्बन्ध ऐतिहासिक रूपमा सुदृढ रहेको स्मरण गराए।
“यदि मलाई ठिक याद छ भने, हामीले सन् १९५६ मा हाम्रा देशहरूबिच कूटनीतिक सम्बन्ध स्थापना गरेका थियौँ। अर्को वर्ष हाम्रो एक प्रकारको वार्षिकोत्सव पनि छ। तर आज पनि हामी हाम्रो सहकार्यको इतिहासका उपलब्धिहरूलाई हेर्न सक्छौँ। मैले यो भन्नै पर्छ कि हाम्रो कहिल्यै कुनै समस्या भएन,” पुटिनले भने।
उनले अन्तर्राष्ट्रिय एजेन्डाका मुख्य विषयमा नेपाल र रुसका धारणा प्रायः नजिक वा मेल खाने गरेको पनि उल्लेख गरे।
भेटमा प्रधानमन्त्री ओली र राष्ट्रपति पुटिनबिचको भेटमा व्यापार–लगानी, अन्तर्राष्ट्रिय मामिलामा सहकार्य, क्षेत्रीय तथा बहुपक्षीय समन्वय र रणनीतिक साझेदारीलाई अझ सुदृढ बनाउने विषयमा छलफल भएको प्रधानमन्त्रीको सचिवालयले जनाएको छ ।
