काठमाडौं, पुस २०- काठमाडौंको गौशालास्थित बागमती होटलमा मृत भेटिएकी सुस्मिता खड्का हत्या प्रकरणका अभियुक्त पनि मृत भेटिएका छन् । हत्यापछि फरार रहेका देवबहादुर थापा मृत भेटिएका हुन् ।
उनी गृह जिल्ला ओखलढुंगामा झुन्डिएको अवस्थामा फेला परेको प्रहरीले जानकारी दिएको छ । ओखलढुंगाका प्रहरी निरीक्षक विजय कार्कीले थापा मृत भेटिएको पुष्टि गरे । ‘सुनकोशीको सिस्नेरीस्थित जंगलमा झुन्डिएको अवस्थामा भेटिएको छ,’ उनले भने । घटनास्थल पुगेर अनुसन्धानको काम थाल्ने उनले बताए ।
पुस १७ बुधबार खड्का होटलको ३०८ नम्बरको कोठामा मृत भेटिएकी थिइन् । होटलमा खड्कासँगै थापा पनि बस्न गएको अनुसन्धानबाट खुलेको छ । हत्या गरेर थापाले कोठामा ताल्चा हानेर फरार भएको प्रारम्भिक अुनसन्धानमा देखिएको प्रहरीले बताएको थियो ।
