काठमाडौँ। झाँक्री प्रकाश भुजेलले चलाएको गाडीको ठक्करबाट गम्भीर घाइते भएकी सानुमाया नगरकोटीको पनि मृत्यु भएको छ ।
कात्तिक २८ गते काठमाडौंको इन्द्रायणीमा दुर्घटना हुँदा कागेश्वरी मनोहरा नगरपालिका–२ घर भएका नारायण नगरकोटी उपचारका क्रममा निधन भएको थियो । सानुमायालाई भेन्टिलेटरमा राखेर उपचार भइरहेको थियो ।
शुक्रवार सानुमाया नगरकोटीको पनि निधन भएको प्रहरीले जनाएको छ । सानुमायाको निधनपछि गरिएको पोष्टमार्टममा उनको पेटमा १२ हप्ता (तीन महिना) को गर्भ रहेको पुष्टि भएको थियो । आमासँगै कोखको शिशुको पनि निधन भएको छ ।
यस्तै नगरकोटी दम्पतीको शव पाँच दिनपछि आज उठाइँदै छ । शव व्यवस्थापन तथा काजक्रियाका निम्ति झाँक्री भुजेल र मृतकको परिवारबीच आर्थिक विषयमा विवाद हुँदा मृतकको परिवारले ग्राण्डी अस्पतालबाट शव उठाएको थिएन ।
प्रहरीका अनुसार, आइतबार दुई पक्षबीच ५२ लाख रुपैयाँ क्षतिपूर्तिमा कुरा मिलेपछि सोमबार शव उठाउने सहमति भएको हो । उनीहरुबीचको मध्यस्थता जिल्ला प्रहरी परिसर भद्रकालीले गरेको थियो ।
पहिला मृतक परिवारले प्रतिव्यक्ति ५० लाखका दरले एक करोड माग गरेको थियो । निरन्तरको वार्ता र स्थानीय जनप्रतिनिधिहरूको मध्यस्थतापछि आइतबार ५२ लाखमा सहमति भएको प्रहरीले जनाएकाे छ । भुजेल अहिले भद्रकालीस्थित जिल्ला प्रहरी परिसरको हिरासतमा छन् ।
