मकवानपुर । कमल थापा र महालक्ष्मी उपाध्याय डिनालाई हराउँदै मकवानपुर क्षेत्र नम्बर १ मा राष्ट्रिय प्रजातन्त्र पार्टी (राप्रपा) का दीपकबहादुर सिंह विजयी भएका छन् । सिंहले गठबन्धनका तर्फबाट उम्मेदवार बनेकी नेपाली कांग्रेसकी केन्द्रीय सह-महामन्त्री महालक्ष्मी उपाध्याय डिनालाई २ हजार ३ सय ९३ मतान्तरले पराजित गर्दै प्रतिनिधि सभा सदस्यमा विजयी भएका हसन् ।
सिंहले २७ हजार ८ सय १४ मत प्राप्त गर्दा उनका प्रतिस्पर्धी डिनाले २५ हजार ४३४ मत प्राप्त गरेकी थिइन । यस्तै, सूर्य चिन्ह लिएर उठेका राप्रपा नेपालका अध्यक्ष कमल थापाले २५ हजार ४ सय २० मत प्राप्त गरेका छन् । यो क्षेत्रमा ९१ हजार ४ सय ८६ मत खसेको थियो ।
सिंहले पहिलो पटक संसदीय चुनाव जितेका हुन् । सिंह यसअघि २०५४ सालमा तत्कालीन हेटौँडा नगरपालिकाको मेयर पदमा नेकपा एमालेका डोरमणि पौडेलसँग, २०५६ मा मकवानपुर क्षेत्र नम्बर-२ मा प्रतिनिधि सभा सदस्य पदमा एमालेकै विरोध खतिवडासँग, २०६४ को संविधानसभा सदस्य चुनावमा नेकपा एमालेका अनन्त पौडेलसँग पराजित भएका थिए ।
