काठमाडौं, असोज ३०- नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले काठमाडौं निर्वाचन क्षेत्र नम्बर २ की गठबन्धनका उम्मेदवार ओनसरी घर्तीमा असाधारण क्षमता रहेको बताएका छन् । आइतबार काठमाडौंको काँडाघारीस्थित शुभ श्री पार्टी प्यालेसमा भएको गठबन्धनको संयुक्त कार्यकर्ता प्रशिक्षणलाई सम्बोधन गर्दै अध्यक्ष प्रचण्डले रोल्पामा जन्मिएर आएकी घर्तीलाई आफ्नै प्रस्तावमा सभामुख बनाएको र सभामुख बनेर कुशलतापूर्वक जिम्मेवारी पुरा गरेको भन्दै अब पनि उनलाई जिताएर पठाए राम्रो विकासे मन्त्री बनाएर पठाउने बताए ।
‘ओनसरी रोल्पाको ग्रामीण इलाकामा जन्मेर संघर्ष गरेर आएको हो । विग फाइभ हो प्रतिनिधिसभाको सभामुख पद भनेको’, प्रचण्डले भने, ‘मैले नै हो उहाँलाई पहिला सभामुखको प्रस्ताव गरेको पनि, उहाँले सफलतापूर्वक जिम्मेवारीपूर्वक भूमिका निर्वाह गर्नुभयो ।’
पूर्व प्रधानमन्त्री समेत रहेका प्रचण्डले भने, ‘ओनसरी घर्तीभित्र क्षमता छ भन्ने देखेपछि यो निर्वाचन क्षेत्रमा उहाँलाई उम्मेदवार बनाएको हो । निर्धक्कसँग ओनसरी नेतृत्वका उम्मेदवारलाई विजयी गराउनुस् । उहाँलाई विजयी गरेपछि राम्रो विकासे मन्त्री पनि बनाइनेछ ।’
