काठमाडौं, असार १९- जिल्ला अदालत ललितपुरका कर्मचारी वकिलबाट असुरक्षा बढेको भन्दै सर्वोच्च अदालत पुगेका छन् ।
जिल्ला अदालतमा कर्मचारी प्रशासनको नेतृत्व गर्ने उपसचिव सरहका श्रेस्तेदार विष्णु पाण्डेयसहित सबै कर्मचारी सुरक्षा माग गर्दै सर्वोच्च अदालतका मुख्य रजिष्टार लालबहादुर कुँवरको कार्यकक्षमा पुगेका छन् ।
नेपाल बार एशोसिएशनका पदाधिकारी र वरिष्ठ अधिवक्ताहरूले आफ्नो र नासु प्रेमिका तामाङको नामै किटेर भ्रष्टाचारको आरोप लगाउँदै सरुवा माग गरेको र धम्की दिएकाले असुरक्षित भएर सर्वोच्चमा आएका पाण्डेले बताए ।
उनले भने– हामीले अदालतको काम रोक्ने भनेको छैन, तर हाम्रो सुरक्षा कसरी हुन्छ भनेर छलफल गर्न आएका हौँ । बार जस्तो जिम्मेवार संस्थाले नै हाम्रो नामै किटेर धम्की दिएको छ, कर्मचारीलाई भ्रष्ट भनेका छन्, हाम्रो पछाडि मान्छे लगाउने धम्की आएको छ । यस्तो वातावरणमा काम गर्न सकिन्न ।
नेपाल बारले नासु प्रेमिका तामाङले अदालतको आदेशको कपी माग्दा अधिवक्ता अमिर लामिछानेसँग घुस मागेको आरोप लगाउँदै उनीसहित श्रेष्तेदारको सरुवा माग गरेको छ ।
