२३ जेठ, काठमाडौं । अमेरिकी राष्ट्रपति डोनाल्ड ट्रम्पले इरानको मिसाइल क्षमतामा ठूलो क्षति पुगेको दाबी गरेका छन्।
उनले अब इरानसँग पहिलेको तुलनामा मिसाइल क्षमताको केवल सानो हिस्सा मात्र बाँकी रहेको बताए ।
उनले इरान हाल परमाणु हतियार विकास गर्ने अवस्थामा नरहेको पनि उल्लेख गरे । एनबीसी न्युजको कार्यक्रम ‘मिट द प्रेस’लाई दिएको अन्तर्वार्तामा ट्रम्पले अमेरिकाले इरानको सैन्य क्षमतालाई पूर्ण रूपमा ध्वस्त पारेको बताए ।
ट्रम्पले इरानसँग अब आफ्नो पुरानो मिसाइल क्षमताको केवल २१ देखि २२ प्रतिशत हिस्सा मात्र बाँकी रहेको दाबी गरे । ट्रम्पले भने, “उनीहरूसँग अझै पनि धेरै मिसाइल छन्, तर हामीले आक्रमण सुरु गर्दा जति थिए, त्यति भने अब छैनन् ।”
यद्यपि, ट्रम्पको यो दाबी अमेरिकी गुप्तचर एजेन्सीहरूको प्रतिवेदनसँग मेल खाँदैन ।
न्युयोर्क टाइम्सको एक रिपोर्टअनुसार अमेरिकी सांसदहरूलाई गत महिना दिइएको ब्रिफिङमा इरानले होर्मुज जलमार्गनजिक रहेका आफ्ना ३३ मध्ये ३० वटा मिसाइल साइटमा पुनः परिचालन नियन्त्रण स्थापित गरिसकेको जानकारी दिइएको थियो ।
रिपोर्टमा युद्ध सुरु हुनुअघिको मिसाइल भण्डारको करिब ७० प्रतिशत हिस्सा अझै सुरक्षित रहेको पनि उल्लेख गरिएको थियो ।
होर्मुज जलमार्गमा जारी तनावबारे ट्रम्पले स्थिति चाँडै सामान्य हुने बताए । यस क्रममा उनले धेरै व्यावसायिक तेल ट्यांकरलाई सुरक्षित मार्ग उपलब्ध गराइएको दाबी गरे ।
उनले खाडी क्षेत्रमा जारी तनाव चाँडै अन्त्य हुने र त्यसपछि तेलको मूल्यमा गिरावट आउन सक्ने बताए । ट्रम्पका अनुसार स्थिति पूर्ण रूपमा सामान्य भएपछि तेलको मूल्य पहिलेभन्दा पनि कम हुन सक्छ ।
