दाङ, चैत १७- नेपाली कांग्रेसका महामन्त्री गगन थापाले अब कांग्रेसले कुनैपनि चुनावमा गठबन्धन नगर्ने बताएका छन् । कांग्रेस अभियानअन्तर्गत थारु संवाद गर्न उक्त समुदायबाट मन्त्री बनिसकेका पर्शुनारायण चौधरीको गाउँ गोवरडिहा पुगेर महामन्त्री थापाले यस्तो बताएका हुन् ।

उनले भने, ‘यो भन्दा अगाडिको यात्रामा कुनैपनि चुनावमा नेपाली कांग्रेस पार्टीका कुनैपनि मतदाताले अव कलममा पनि भोट हाल्ने छैन । हँसिया हथौडामा पनि भोट हाल्ने छैन् । गिलासमा पनि भोट हाल्ने छैन । नसके केही छैन, बरु चकटीमै बसौंला तर चुनावमा गठबन्धन हुने छैन ।’

उनले चुनावअघि गरिने गठबन्धनले नेपालको लोकतन्त्रलाई विकृत बनाएको बताए । फोहर सफा गर्न पार्टीको अहिलेको ताकतले नपुग्ने भन्दै उनले पार्टी भित्र हार्दिक एकता निर्माण गर्नुपर्ने भनाइ उनको छ ।