कुवेत, फागुन २१- नेपालका प्रथम शहिद क्याप्टेन लखन थापा मगरको स्मृतिमा कुवेतमा सन् २०१४ देखी सञ्चालन गरिएको शहिद लखन थापामगर रनिङ् शिल्ड गोल्ड कप अन्तर नेपाली भलिवल टुर्नामेण्टको तेश्रो संस्करण आगामी १२ मे हुने भएको छ ।
कुवेतको नेपाली समुदायमा सन् २०१२ देखी कृयाशिल रहँदै आएको नेपाल मगर सँघले लखन थापामगर गोल्ड कपको स्थापना गरि ०७ फेब्रुअरी २०१४ मा पहिलो संस्करण सम्पन्न गरेको थियो । जसमा S.D.F.C टिम बिजेता र आयोजक मगर सँघ कुवेत उपबिजेता बनेका थिए भने १३ मार्च २०१५ मा आयोजना गरिएको दोश्रो संस्करणमा अल्घानिम सेक्युरिटी टिम बिजेता र नेवा गुठी उपबिजेता बनेका थिए ।
गोल्ड कपको दोश्रो संस्करण पश्चात विविध प्राविधिक कारण्हरुवश अनिश्चित कालसम्मको लागि स्थगित गरेको गोल्ड कपलाई मगर सँघ कुवेतले ७ बर्ष लामो बिश्राम पश्चात पुन. निरन्तरता दिने भएको हो ।
गत शुक्रबार फर्वानियास्थित गार्डेनमा अध्यक्ष बसन्त थापा मगरको अध्यक्षतामा बसेको १३१औं नियमित बैठकले शहिद लखन थापामगर गोल्ड कपलाई पुन सञ्चालनमा ल्याउने निर्णय गर्दै, कुवेतस्थित सम्पूर्ण नेपाली भलिवल टिमहरुलाई यस टुर्नामेण्टमा सहभागी हुन आव्हान गरेको छ भने उक्त दिन कुनै पनि नेपाली सँघ संस्थाहरुले अन्य कार्यक्रमको आयोजना नगरिदिनु हुन र सौहार्दपूर्ण बातावरणमा सम्पन्न पार्न सहयोग गरिदिन अनुरोध गरिएको छ ।
कुवेतको कुनै एउटा सुविधा सम्पन्न स्टेडियममा आयोजना गरिने टुर्नामेण्टको लागि खेल मैदानको खोजी भई रहेको र तय हुन साथ पुन सूचित गरिने पनि आयोजक मगर सँघ कुवेतले बताएको छ ।
