काठमाडौं । नेकपा एकीकृत समाजवादीका नेता झलनाथ खनालले आफ्नो पार्टीलाई राष्ट्रपतिको प्रस्ताव नआएको बताएका बताए । बुधबार पार्टीको सचिवालय बैठकपछि सञ्चारकर्मीहरुसँग कुरा गर्दै खनालले पछिल्लो समय भएको भेटघाटबारे अध्यक्ष माधवकुमार नेपालले रिपोर्टिङ गरेको तर राष्ट्रपतिको प्रस्ताव आएको बारे केही नबोलेको बताए ।
‘अध्यक्षले अहिलेको परिस्थितिको सन्दर्भमा, भेटघाटको सन्दर्भमा रिपोर्ट गर्नुभयो, तर राष्ट्रपतिको प्रस्ताव हाम्रो पार्टीलाई आएको भन्ने चाहिँ, त्यस्तो रिपोर्टिङ भएन’ उनले भने, ‘त्यसको अर्थ अहिलेसम्म हाम्रो पार्टीलाई राष्ट्रपतिको प्रस्ताव आएको भन्ने जुन हल्ला छ नि त्यो हल्लामात्र रहेछ भन्नुपर्यो ।’
सोमबार नेकपा एमालेका अध्यक्ष केपी शर्मा ओलीले एकीकृत समाजवादीका अध्यक्ष नेपालबीच भेटवार्ता भएको थियो । सो भेटमा नेपाललाई ओलीले राष्ट्रपतिमा प्रस्ताव गरेको एमाले स्रोतले बताएको थियो ।
नेता खनालले राष्ट्रपति निर्वाचनमा आफूहरुको पनि सरोकार रहेको भन्दै यसबारेमा छलफल सुरु गर्ने बताएका छन् । ‘हामीसँग पनि निकै ठूलो मत छ । हामी सबैसँग यसबारेमा कुराकानी गर्छौं’ उनले भने ।
नेता खनालले राष्ट्रपति चुनावमा एमालेसँग सहकार्य हुन सक्ने सम्भावना पनि रहेको औंल्याए । ‘यो सवाल कठिन कठिन सवाल छ । मिल्दै मिल्दैन कसरी भन्नु, मिल्छ भन्ने आधार तयार भएकै छैन’ उनले भने । एकीकृत समाजवादीका प्रचार विभाग प्रमुख जग्गनाथ खतिवडाले पनि राष्ट्रपतिका बारेमा आफ्नो पार्टीलाई कुनै पनि व्यक्ति र पार्टीले प्रस्ताव नगरेको दाबी गरे।
