२० भदौ, काठमाडौं । रसुवाको भोटेकोशी नदीमा आएको भीषण बाढीको ११ दिनपछि नुवाकोटको बेत्रावतीबाट ६४ वर्षीया चन्द्रिका श्रेष्ठको जीवितै उद्धार गरिएको छ।
विदुर नगरपालिका–१० की श्रेष्ठलाई बेत्रावती बजारस्थित आनन्द श्रेष्ठको घरबाट सशस्त्र प्रहरी बलको टोलीले अचेत अवस्थामा उद्धार गरेको हो।
सशस्त्र प्रहरी बलका प्रहरी निरीक्षक सुमन बिकको कमान्डमा खटिएको टोलीले खोजीका क्रममा श्रेष्ठलाई घरभित्रबाट फेला पारेको थियो।
उद्धारपछि श्रेष्ठलाई प्रारम्भिक उपचारका लागि हेलिकप्टरमार्फत त्रिशूलीस्थित नेपाली सेनाको मैबल ब्यारेक ल्याइँदैछ।
त्यहाँ प्रारम्भिक उपचार गरेपछि उनको स्वास्थ्य अवस्था हेरेर थप उपचारका लागि काठमाडौं ल्याउने तयारी गरिएको छ।
११ दिनअघि भोटेकोशी नदीमा आएको भीषण बाढीपछि विभिन्न स्थानमा ठूलो जनधनको क्षति भएको छ। यसबीच लामो समयपछि श्रेष्ठ जीवितै फेला पर्नु उद्धार अभियानमा अर्को आशाजनक घटनाका रूपमा देखिएको छ।
