३१ साउन, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेको प्रस्तावित चीन भ्रमणको मिति पछि सरेको छ।
यसअघि अगस्टको दोस्रो साता चीन जाने तयारीमा रहेका लामिछाने अब सेप्टेम्बरको दोस्रो साता भ्रमणमा जाने भएका छन्।
आन्तरिक तयारीलगायतका कारण पूर्वनिर्धारित कार्यतालिका परिवर्तन गरिएको बताइएको छ। भ्रमणका क्रममा लामिछाने तिब्बतस्थित धार्मिक तथा पर्यटकीय स्थल मानसरोवर पुग्ने कार्यक्रमसमेत तय भएको स्रोतले जनाएको छ।
चीनमा रहँदा लामिछानेले चिनियाँ कम्युनिस्ट पार्टीका नेताहरू तथा सरकारका उच्च तहका अधिकारीसँग भेटवार्ता गर्ने तयारी रहेको बताइएको छ।
यसअघि भारत भ्रमणका क्रममा नयाँदिल्लीमा भारतीय प्रधानमन्त्री नरेन्द्र मोदीसँग भेटवार्ता गरेर फर्किएका लामिछानेले चीन भ्रमणमा पनि त्यस्तै उच्चस्तरीय भेटवार्ता गर्ने वातावरण बनाउन पहल गरिरहेको बताइएको छ।
