इलाम, बैशाख १६- इलाम–२ अन्तरगत उपनिर्वाचनको मतगणनामा नेकपा एमालेका उम्मेदवार सुहाङ नेम्वाङले अग्रता बनाएका छन् । उनले नेपाली कांग्रेसका उम्मेदवार डम्बरबहादुर खड्कालाई उछिनेका हुन् ।

सुरुवाती परिणाममा १२३ मतले पछि परेका नेम्वाङले फाकफोकथुम गाउँपालिका-१, २, ३ र ४ को मतगणना सकिँदा कांग्रेस उम्मेदवार डम्बरबहादुर खड्कालाई उछिन्दै ३४५ मतको अग्रता बनाएका हुन् । नेम्वाङले २ हजार ५४२ मत पाएका छन् भने खड्काले २ हजार १९७ मत पाएका छन् ।

५ हजार ७७८ मत गणना हुँदा स्वतन्त्र उम्मेदवार डकेन्द्र लिम्बुले ५९३ मत पाउँदा रास्वपाका मिलन लिम्बुले ३ सय ७९ मत पाएका छन् ।

कुल १ लाख १५ हजार ८८९ मतदाता रहेको यो क्षेत्रमा ६९ हजार २८७ मत खसेको थियो ।