२ कार्तिक, सिन्धुपाल्चोक । यही कात्तिक १ गतेदेखि अस्थायी रूपमा सञ्चालनमा ल्याइएको नेपाल–चीनको तातोपानी नाकालाई नियमित रूपमा सञ्चालनमा ल्याउन माग गरिएको छ ।
नेपाल हिमालय सीमापार बाणिज्य संघका महासचिव रामचन्द्र पराजुलीका अनुसार हाल यो नाका तीन दिन मात्रै सञ्चालन हुने भएकाले चाडपर्वलक्षित सामग्री उतै रहने जोखिम बढेको छ ।
“चीनको सिचाङस्थित न्यालम क्षेत्रमा दसैँ, तिहारलगायतका चाडपर्वलक्षित सामान बोकेका ४५ भन्दा बढी कन्टेनरहरू रोकिएका छन्, अस्थायी रूपमा तीन दिनमात्रै सञ्चालनमा आएको नाकाबाट ती सामान ल्याउन सम्भव छैन, त्यसैले नियमित रूपमा सञ्चालन आवश्यक छ,” उनले भने ।
महासचिव पराजुलीका अनुसार, संघले चीन सरकार र नेपालस्थित चिनियाँ दूताबासलाई ध्यानाकर्षण पत्र बुझाएर नाका निरन्तर सञ्चालनको माग गरिसकेको छ । उनका अनुसार, चाडपर्व लक्षित सामान बोकेका कन्टेनरहरू सीमामा रोकिएको छन्, यी सामानहरूमध्ये ठूलो हिस्सा नाशवान् वस्तुहरू, कृषि उत्पादनहरू तथा मौसमी व्यापारिक सामग्रीहरूको रहेको छ, जुन तत्काल बिग्रने जोखिममा छन् ।
अन्य नाकाहरू सञ्चालन नभईरहेको अवस्थामा दुई देशबीचको व्यापारलाई सहज बनाउन तातोपानी नाका पूर्ण रूपमा सञ्चालन हुन जरुरी भएको उनको भनाइ छ ।
तातोपानी भन्सार कार्यालयका भन्सार अधिकृत नरेन्द्रसिंह चैसिरका अनुसार, नाकाबाट आइतबार तीन वटा मालवाहक कन्टेनर भित्रिएका थिए भने आज साँझसम्म सात वटामात्रै कन्टेनर आएका छन् ।
“कार्गो ट्रकका लागि मात्रै चीनले अनुमति दिएका कारण साना कन्टेनरहरू आउन सकेका छैनन्,” उनले भने । भित्रिएका कन्टेनरहरूमा फलफूल, जुत्ता, तयारी पोशाक र कृषिजन्य सामग्रीहरू रहेको उनले जानकारी दिए ।
