२६ भदौ, काठमाडौँ । पैसा तिर्न नसकेको भन्दै सप्तरीको गजेन्द्र नारायण सिंह अस्पतालले प्रस्तुति व्यथा लागेकी एक महिलाले सडक पेटीमै बच्चा जन्माउन बाध्य भएको विषयमा आलोचना भएपछि अस्पतालले ६ जना कर्मचारीलाई कामबाट हटाएको छ ।
अस्पतालले आज सूचना प्रकाशित गर्दै डा.उषा देवसहित सुरक्षा गार्ड देवकान्त झासम्मलाई कामबाट हटाएको जनाएको हो । देव र झासहित स्टाफ नर्सद्वय मनिषा कुमारी साह र सजन चौधरी, कास रेणु ठाकुर र स्वीपर कृष्ण मेहतरलाई कामकाजबाट हटाएको अस्पतालले जनाएको छ । उनीहरूलाई छानबिन समितिले प्रतिवेदन नदिएसम्म कामबाट हटाएको अस्पतालको भनाइ छ ।
गत मंगलबार राजविराज नगरपालिका–१४ पर्साही बस्ने हरेराम पासवानकी श्रीमती बबिता पासवानले अस्पतालले भर्ना नलिएपछि सडक पेटीमै बच्चा जन्माएकी थिइन् । उक्त दृश्य सार्वजनिक भएपछि सर्वत्र आलोचना भएको थियो । त्यसपछि सरकारले छानबिन समिति गठन गरेर त्यसतर्फ पठाइसकेको छ ।
