२९ असार, काठमाडौं । विभिन्न सञ्चारमाध्यमको गेट अगाडि शंकास्पद रुपमा निजी गाडीहरू पार्किङ गरी आवतजावतमा अवरोध पुर्याइएको पाइएको छ।
आज बिहान साढे ७ बजेदेखि कान्तिपुर पब्लिकेसन्स, अनलाइनखबर र हिमालय टेलिभिजनको कार्यालय गेटमा शंकास्पद निजी गाडीहरू पार्किङ गरी आवतजावतमा अवरोध पुर्याइएको छ ।
तीनकुने स्थित कान्तिपुरको कार्यालय नयाँ बानेश्वरमा रहेको अनलाइखबरको र मध्यबानेश्वरमा रहेको हिमालयन टेलिभिजनको कार्यालय प्रवेशद्वारमा गाडी तेर्स्याइएका कारण पत्रकारहरूलाई रिपोर्टिङमा जान र सवारी साधन भित्र(बाहिर गर्न कठिन भएको छ ।
यी गाडीहरू कसले र किन राखेको भन्ने खुलेको छैन । मिडिया हाउसहरूले बिहानै जानकारी गराए पनि ट्राफिक प्रहरीले ११ बजेपछि मात्र कानुनी प्रक्रिया सुरु गरी कान्तिपुरको गेटमा रहेको गाडीमा ‘ह्विल(लक’ लगाएको छ । प्रहरी टोली परिचालन गरिएको र घटनाबारे अनुसन्धान भइरहेको जनाएको छ ।
