म्याग्दी, साउन १७- घरमाथिबाट खसेको पहिरोमा परेर म्याग्दीमा दुई जनाको मृत्यु भएको छ । पहिरोमा परेर तीन जना बेपत्ता भएका छन् ।

जिल्लाको मालिका गाउँपालिका–२ रुमको गाजा तामेङमा पहिरोले तीन घर पुरिएको थियो ।

अविरल वर्षासँगै गएराती घरमाथिबाट पहिरो खसेर तीन घर पुरीएका थिए ।

पहिरोमा पुरिएर नविन विक र राजन विकको मृत्यु भएको वडा सदस्य भक्तिबहादुर घर्ति मगरले जानकारी दिए । उनका अनुसार, पहिरोमा घामबहादुर विक, राजु विक, रोजी विक बेपत्ता भएका छन् ।

बिहानैदेखि स्थानीयबासीले बेपत्ता भएकाहरुको खोजी गरिरहेका छन् । वर्षा र पहिरोले खोजी कार्य प्रभावित बनेको छ ।

अहिले इलाका प्रहरी कार्यालयबाट प्रहरी टोली घटनास्थलतर्फ लागेको जनाइएको छ ।