काठमाडौं । प्रधानमन्त्री सुशीला कार्कीले जेनजी आन्दोलनको क्रममा भएको आगजनी र तोडफोडका घटना सुनियोजित हुन सक्ने बताएकी छन् ।
पदभार ग्रहण समारोहमा सम्बोधन गर्दै उनले सो कुरा बताएकी हुन् । ‘यो प्लान वे, षडयन्त्रै भएको हो कि भन्ने लागेको छ,’ कार्कीले भनिन् ।
उनले यसबारे छानबिनपछि सत्यतथ्य बाहिर ल्याउने बताइन् ।
उनले सिंहदरबार, संसद भवन, सर्वोच्च अदालत, व्यापारिक कम्प्लेक्स लगायतका सरकारी कार्यालयहरुमा भएको आगजनी लज्जास्पद भएको बताइन् ।
यस्तै प्रधानमन्त्री कार्कीले आफू रहरले प्रधानमन्त्री नबनेको बताएकी छन्।
सिंहदरबारमा आज पदभार ग्रहण गर्दै उनले आफू जनभावनाअनुसार प्रधानमन्त्रीमा नियुक्त भएको बताएकी हुन्।
‘जुन परिस्थितिमा म आएँ, रहरले आएको होइन,’ उनले सम्बोधनका क्रममा भनिन्, ‘सडकबाटै मलाई जिम्मा दिँन आग्रह भएपछि म आएको हो। म सत्ताको रसस्वादन गर्न आएको होइन। उमेर पनि मेरो त्यो होइन। सेवा गर्न आएको हो।’
उनले ६ महिना भन्दा बढी आफू सत्तामा नबस्ने पनि बताइन्। ‘नयाँ आउने संसद् र मन्त्रीहरूलाई जिम्मेवारी सुप्पिने अठोट म गर्छु। मलाई उहाँहरूले साथ दिनुपर्छ। सबैको साथ नभए यो संकटबाट पार पाउन सम्भवन छैन।’
उनले आफूलाई चुनौतिपूर्ण परिस्थितिमा प्रधानमन्त्रीको पदभार ग्रहण गर्ने मौका मिलेको भन्दै सफलताको कामना गर्ने सबैलाई धन्यवाद दिइन्।
‘कुन परिस्थितिमा अन्तरिम सरकारको गठन भयो हामी जानकारी छौँ। २७ घण्टाको आन्दोनलमा यो सबै भयो,’ उनले भनिन्।
