काठमाडौं, असार ७- पेट्रोलियम पदार्थको मूल्यवृद्धि, एसपिपी सम्झौता, रासायनिक मलको अभाव लगायतको विरोधमा सत्तारुढ दल नेकपा एकीकृत समाजवादी निकट विद्यार्थी संगठन अनेरास्ववियूले विरोध प्रदर्शन गरेको छ ।

अनेरास्ववियूले शंकरदेव क्याम्पसअगाडि प्रदर्शन गरेको हो । अध्यक्ष सुदेश पराजुली नेतृत्वको अखिलका विद्यार्थीले प्रदर्शनका क्रममा  अर्थमन्त्री जनार्दन शर्मा र आपूर्तिमन्त्री दिलेन्द्रप्रसाद बडूको पुत्लासमेत जलाएका छन् ।

उनीहरुले ‘मूल्यवृद्धि फिर्ता गर’, ‘नालायक सरकार राजीनामा दे’, ‘शेरे तेरो पाराले दु:ख पायो साराले’ जस्ता नारा लगाएका थिए ।

उनीहरूले पेट्रोलिय पदार्थको मूल्यवृद्धिको निर्णय फिर्ता लिन, महँगी नियन्त्रण गर्न, किसानलाई पर्याप्त रासायनिक मल उपलब्ध गराउन माग गरेका थिए ।

प्रदर्शनमा प्रहरीले बल प्रयोग गर्दा सामान्य झडपसमेत भएको थियो ।