काठमाडौं । एमाले अध्यक्ष केपी शर्मा ओली, माओवादी केन्द्रका अध्यक्ष पुस्पकमल दाहाल प्रचण्ड र नेकपा एकीकृत समाजवादीका सम्मानित नेता झलनाथ खनालबीच शीतल निवासमा जम्काभेट भएको छ । २०७७ मा तत्कालीन नेकपा खारेज भएदेखि संवादहीन अवस्थामा रहेका यी नेताहरूबीच एक आपसमा कुराकानी समेत भएको बताइएको छ ।

प्रतिनिधिसभाका ज्येष्ठ सदस्य पशुपति शम्सेर जबराको शपथग्रहण समारोहमा ओली, प्रचण्ड र खनालबीच बुधबार शितल निवासमा जम्काभेट भएको हो । प्रचण्ड र खनालसँगको भेटका तस्वीरहरू एमाले अध्यक्ष ओलीको सचिवालयले सार्वजनिक गरेको हो ।

ओली, प्रचण्ड र अर्का पूर्वप्रधानमन्त्री झलनाथ खनाललाई लहरै राखिएको थियो । त्यस्तै एमालेबाट छुट्टिएका खनालसँग पनि ओलीले कुरा गरेका थिए । तर उनीहरुबीच भएको कुराकानीबारे केही खुलाइएको छैन ।